លី កល្យាណ

ខ្ញុំឈ្មោះ៖ លី កល្យាណ

ភេទ៖ ស្រី (អ្នកនៅកន្លែងធ្វើការលួចខ្សឹបគ្នាក្នុងបន្ទប់មួយទៀតថាខ្ញុំសង្ស័យតែស៊ីមពីរ ពេលខ្ញុំចូលទៅទាន់ ខ្ញុំស្រែកតវ៉ាថា ខ្ញុំមិនមែនស៊ីមពីរទេ គឺស៊ីមប្រាំបី សូមពិចារណាទៅចុះ… នេះសំណាងណាស់ដែលនិយាយ ដើមខ្ញុំពេលខ្ញុំដឹងទាន់ខ្ញុំប្រាប់ពួកគាត់វិញ កុំអីយល់ច្រឡំប៉ាដោយ)

កើតនៅថ្ងៃទី ០៣ ខែ តុលា ឆ្នាំ ១៩៨០

ស្រុកកំណើត៖ ទីរួមខេត្តកំពង់ធំ

ទម្ងន់៖ ៦២ គីឡូក្រាម

កម្ពស់៖ ១ម៉ែត្រ ហាសិបពីរសង់ទីម៉ែត្រ (ខ្លាឃ្មុំសុទ្ធតែម្តង)

ធ្លាប់ប្រកួតសាកកម្លាំង៖ ៥ដង

ចាញ់៖ ៤ដង (ក្នុងនោះសន្លប់ទាំង ៤ ដង)

ស្ថានភាពគ្រួសារ៖ នៅលីវ

បងប្អូនម្តាយបង្កើត៖ ៣នាក់ (ស្រី២ ប្រុស១ ខ្ញុំបងគេ)

អាសយដ្ឋានបច្ចុប្បន្ន៖ ស្រុកស្ទឹងសែន ខេត្តកំពង់ធំ (ផ្ទះនៅដដែលទេ តែមនុស្សដើរគ្មាននៅផ្ទះសោះ)

ផ្ទះដែលនៅបានញឹកញាប់ជាងគេ៖ ភូមិហ្វេសប៊ុក និងវើតប្រេស

https://smilesealed.wordpress.com

http://sahakkum.wordpress.com

http://www.facebook.com/kalyane.ly

http://facebook.com/LongHumFamily

http://www.smilesealed.blogspot.com

ចូលចិត្ត៖ ដើរកំសាន្តតាមព្រៃភ្នំ ដេកលេងមាត់ទឹក លេងហ្វេសប៊ុក និងវើតប្រេស។

អត់ចូលចិត្ត៖ កន្លែងមានមនុស្សច្រើន ហាត់ប្រាណ ដើរលេងមាត់ទន្លេ (មាត់ទន្លេនៅភ្នំពេញធុំក្លិនអត់ល្អ)។

ខ្ញុំអត់ចេះធ្វើម្ហូបទេ តែខ្ញុំចូលចិត្តញ៉ាំណាស់។ ស្អីក៏ញ៉ាំបាន គ្រប់មុខ គ្រប់ពេលវេលា ហៅទៅស្មើណាក៏បាន។

ម្ហូបដែលពេញចិត្ត៖ ខ្យងអាំង ក្តាមប្រៃ បុកក្រសាំងត្រីឆ្អើរ ហាំប៊ឺហ្គ័រ ភ្លៅមាន់បំពង សម្លរម្ជូរស្រែ ឆាផ្សិត ចំបើង បុកសាច់គោអាំងសណ្តែកកួរ ចំហុយផ្អក ប្រហុក (កុំលាយគ្រឿង)។

ម្ហូបដែលមិនញ៉ាំដាច់ខាត៖ ស្ងោរត្រីងៀតត្រឡាច ឆាត្រសក់ ឆាព្រលិត ឆាស្ពៃជូរ ប្រហុកខ្ទិះ សម្លការី សារាម៉ាន់ និងឆាខ្ញី។

យានជំនិះ៖ ម៉ូតូហុងដាគុបសម័យឆ្នាំប៉ែតជាងមួយ និងកង់មួយ។

កាមេរា៖ ខ្ញុំស្រឡាញ់កាមេរា អូឡាំភឺស របស់អ៊ំ ដែលគាត់ទិញឱ្យតាំងពីឆ្នាំ២០០០ វាជាកាមេរាប្រើហ្វីល និង មានកញ្ចក់កែវចាប់រូបភាពបានច្បាស់ល្អ។ ឥឡូវនេះ ខ្ញុំពេញចិត្តនឹងកញ្ចក់របស់ កាមេរាឡីកា និង ហាស៊ែល ប្លេដព្រោះតែភាពភ្លឺច្បាស់ និងល្បឿនថតលឿនគ្រាន់បើ។ តែបញ្ហាគឺនៅត្រង់ថា គ្មានសមត្ថភាពឈោងដល់ ទេ បើសិនជាអាច គឺបានត្រឹមតែ កាមេរានីកុងត្រឹមបួនរយដុល្លានោះ ក៏ល្អពេកណាស់ទៅហើយ។

ការងារបច្ចុប្បន្ន៖ ធ្វើការជាមួយសហគមន៍ជិតមួយទសវត្សរ៍កន្លះទៅហើយ ឥឡូវនៅតែធ្វើការជាមួយ សហគមន៍ (សហខឹង) ហ្នឹងដដែល។

ទីកន្លែងដែលចាប់ចិត្តជាងគេ៖ ឆ្នេរសមុទ្រកំពង់សោម

អ្នកចម្រៀងប្រចាំបេះដូង៖ លោក ស៊ិន ស៊ីសាមុត លោកស្រី រស់ សេរីសុទ្ធា (បើសិនពួកគាត់នៅរស់ម្ល៉េះសមត្រូវ ទទួលដំណែងជា ឯកឧត្តម និងលោកជំទាវ)

បទចម្រៀងប្រចាំចិត្ត៖ ជីវិតកម្មករត្បូង

សៀវភៅប្រលោមលោកសំណព្វចិត្ត៖ មាលាដួងចិត្ត របស់លោក នូ ហាច (សុំបើកវង់ក្រចកបន្តិច៖ មនុស្ស សម័យមុនគេធ្វើការងារបានប្រយោជន៍ធំធេងប៉ាប៉ុនណាណី តែអត់ដែលឮហៅឯកឧត្តមអីសោះ សូម្បីរដ្ឋ មន្រ្តីគេហៅថា លោករដ្ឋមន្រ្តី ដល់សម័យនេះកុំថាដល់ទៅដែលឮឈ្មោះ ក៏ស្រាប់តែបានបុណ្យទៅជា ឯកឧត្តមអស់ សូម្បីខ្ញុំក៏វិលមុខដែរ។)

កំណាព្យប្រចាំចិត្ត៖ មួយសៀវភៅបុប្ផាខ្មៅ របស់លោក គយ សារុន

រឿងខ្មែរប្រចាំចិត្ត៖ អនអើយស្រីអន

រឿងបរទេសដែលចូលចិត្ត៖

= រឿងអាមេរិចកាំង៖ Yours, mine and ours,  The Break up, Imagine Me & You, The Wedding Date, Bay Watch, The World Unseen, I can’t think straight, Indiana Jones and its series, The Thomas Crown Affair, Lost and Delirious, Elizabeth Town, Little Children, Lost, The L Word, Don’t say a word, Just Married, When night is falling, Home Alone and its series, ម្តាយខ្ញុំ(ចូលចិត្តរឿងស៊ើបអង្កេត គាត់ជាអ្នក តាមដាន រឿងកាត់ក្តី ព្រោះគាត់ចង់ចាប់ល្បិចរបស់កូនៗថាអាមួយណាប្រុងលួចលុយម៉ែ) ជីដូនខ្ញុំ (ចូលចិត្ត រឿងធម៌ អាថ៌ រឿងព្រះ មិនបាច់បកស្រាយវែងទេ) ប្អូនៗខ្ញុំ ទាំងពីរ(អាប្រុសចូលចិត្តរឿងបាញ់គ្នា កាប់ចាក់ ព្រោះវាចង់ចេះ ល្បិចមួយ ចំនួន ចំណែកប្អូនស្រីចូលចិត្ត រឿងកំប្លែង តុក្កតា ព្រោះវាចង់រកវិធីល្បួងលោម ម្តាយតាមរបៀប កំប្លែង ឯខ្ញុំ ចូលចិត្តរឿងប្រលោមលោក តថៈព្រោះខ្ញុំចង់ប្រាប់ម្តាយថាខ្ញុំចង់បានជីវិតដូច របៀបក្នុងរឿងចឹង) ម្នាក់ៗសុទ្ធតែ មើលរឿងខុសៗគ្នា តែមាន រឿងភាគពីរដែលពួកយើងអាចអង្គុយមើល ជុំគ្នាបាន គឺរឿង ទេវតាធ្លាក់ពីលើមេឃ (The Gods Must Be Crazy I & II) និង ឆ្មារ និងកណ្តុរ (Tom and Jerry and its series), etc.

= រឿងកូរេ៖ Bad Love, Sea God, 49 Days, The Sword With no name, Three Dads One Mom, Three Brothers, White Night, Crazy First Love, My wife got married, etc.

= រឿងជប៉ុន៖ O’Shin, Waiting in The Dark, A Litter of Tears, Tokyo’s Rose, etc.

= រឿងថៃ៖ ឋានសួគ៌លម្អៀង, ស្វាមីប្រថាប់ត្រា, កុលាបមានបន្លា, បេះដូងប្រេះស្រាំ, ឈ្លើយស្នេហ៍, ប្រពន្ធដើម, គូកម្ម និងស្នេហ៍យើង…ជានិរន្តរ៍ ។ល។

ខ្ញុំជាអ្នកស្រឡាញ់សត្វចិញ្ចឹម ៖ ឆ្កែ គោ ត្រី អណ្តើក កន្ធាយ ទន្សាយ ក្របី លលក សេក អន្សង មាន់ ។ល។

ឆ្កែខ្ញុំឈ្មោះ៖ លី អសុរិន្ទ, លី អង្គារា, លី យស, លី ស័ក្តិ, លី មានី, លី បានី, និង Johnny Ly

កូនកន្ធាយខ្ញុំ៖ James ស Ly, John ខ្មៅ Ly

លលក៖ Gee Gee Ly

គោខ្ញុំ៖ អាត្នោត អាផ្កាយ អាពាល

អន្សង៖ បងគ្រុយ

ត្រី៖ ច្រើនពេកណាស់ខ្ជិលរៀបរាប់ គ្រាន់តែមានមួយដែលធំជាងគេ ព្រោះចិញ្ចឹមមកប្រាំឆ្នាំហើយ គឺអាក្រពើ ជាត្រីអណ្តែងដែលទិញទៅឱ្យអ៊ំគាត់ចិញ្ចឹមយកលក់ តែគាត់មិនលក់ទេ ទុកទាល់តែធំជាងកជើងទៀត ។

អំពីផ្ទាល់ខ្លួនរបស់ខ្ញុំ៖

ប្រតិកម្ម៖ ខ្ញុំមានប្រតិកម្មជាមួយស្រមោចក្រហមខាំ ជាមួយក្លិនក្រអូបឆួល ដូចជាសាប៊ូកក់សក់ក្លិនដិត សាប៊ូ ដុសខ្លួនក្លិនខ្លាំងៗ ទឹកអប់ក្លិនមុត ដូច្នេះបានជាខ្ញុំមិនចូលចិត្តសម្លមានគ្រឿង (ការី សារាម៉ាន់ ប្រហុកគ្រឿង) ។ មាននរណាដូចខ្ញុំអត់? ពេលណាកក់សក់ ខ្ញុំក្អួតរាល់ដង ពេលមាននរណាបាញ់ទឹកអប់ ក្លិនមុតខ្លាំងក៏ខ្ញុំអាច ក្អួតបានដែរ តែសូមធានាថាទៅដល់ក្រហែងជើងមេឃណា តាមឡានតាមកប៉ាល់ខ្ញុំ មិនក្អួតទេ។ រួចបើក្អែបខាំ ឬខ្ទួយទិច ខ្ញុំឥតមានចាញ់ទេ ឯសត្វអារ៉ងក្សត (អម្បូរក្អែបតែធំជាង ច្រើនមាន នៅតាមគុម្ពចេក) ស្រុកខ្ញុំហៅ អញ្ចឹង បើវាខាំ ឬខ្យាដំរីទិច ខ្ញុំគ្រាន់តែហើមត្រង់នោះពីរបីថ្ងៃ ឬគ្រុនមួយថ្ងៃ ពីរគឺអត់អីទេ តែមិនដែលបានសាក ជាមួយពស់ឡើយ។ ជាមួយស្រមោចបើវាខាំខ្ញុំ គឺដឹងតែត្រង់នោះនឹង ក្លាយជាដំបៅបាន។ ឃ្មុំទិច ឆ្កែខាំ ក៏មិនអី ដែរ តែមកចាញ់តែស្រមោច។

អ្នកដឹងទេថា សត្វតុកកែដែលនៅតោងខ្លួនឆ្កែ វាមិននៅលើខ្លួនមនុស្សទេ ហើយចៃដែលនៅលើក្បាល មនុស្ស ក៏មិនព្រមនៅលើខ្លួនឆ្កែដែរ។

ខ្ញុំកើតមកពីម្តាយខ្ញុំ ដូច្នេះហើយបានជាពេលណាមានលំបាក ខ្ញុំតែងរត់រកគាត់ជានិច្ច គាត់ជាព្រះរបស់ខ្ញុំ និងក៏ ជាមនុស្សដែលខ្ញុំអាចតោងស៊ីបានមួយជីវិត (ឡាហ៍)។

–  ខ្ញុំជាអ្នកការពារបរិស្ថាន (រិះ លាមកក្តាប់ ថាតាមបង Somada) គិតជានិច្ចពីការតស៊ូក្នុងកិច្ចការពារ បរិស្ថាន ធម្មជាតិ របស់ណាដែលប្រើទៅប៉ះពាល់ដល់បរិស្ថានខ្ញុំបានកាត់បន្ថយតាមដែលអាចធ្វើទៅ បាន។ ខ្ញុំមិនដែល ញ៉ាំនំកញ្ចប់ឡើយ។

–  សិល្បៈនៃការនិយាយ ៖ ចែករំលែកការសប្បាយនិងភាពរីករាយពីកន្លែង មួយទៅកន្លែងមួយទៀតតាមរយៈ រឿងកំប្លែង-បទពិសោធន៍ជាក់ស្ដែង។

–  សិល្បៈនៃការតែងខ្លួនៈ សាមញ្ញកាន់តែច្រើនកាន់តែល្អ ព្រោះចូលជាមួយអ្នកដែលស្ថិតនៅក្រោមបន្ទាត់នៃ ភាពក្រីក្របានច្រើនដោយសារខ្លាចបដិវត្ដន៍កសិករកើតឡើងជាថ្មីម្ដងទៀត។ ខោ និងអាវយឺតគឺសមរម្យ ណាស់សំរាប់មនុស្សដែលត្រូវការភាពសាមញ្ញដូចខ្ញុំ។

–  គំនិតៈ ដើម្បីអ្នកដទៃរស់នៅមានសេចក្ដីសុខទោះយើងពិបាកបន្ដិចក៏មិនអីដែរ។ ហ៊ានធ្វើ ហ៊ានទទួល ខុសត្រូវ ចាញ់ត្រូវតែកែប្រែ ឈ្នះដើរចេញ ដោយភាពស្ងប់ស្ងៀម។

–  កាងារផ្ទះ៖ មើលអំពូលភ្លើង ម៉ាស៊ីនក្រឡុកគ្រឿង ទូរស័ព្ទ ទូរទស្សន៍ ម៉ាញ៉េ បាស កង្ហារ ពេលវាខូច បើជួសជុល កើតជួសជុលដោយខ្លួនឯង។ លាងឡាន ជួសជុលឡាន ម៉ូតូ កង់ ម៉ាស៊ីនបូមទឹក ស្រោចទឹកផ្កា និងបូមទឹក។

ចរិត    ៖ ប្រុស អួតអាងបន្ដិចហើយ មិនខ្វល់ថានរណាគាំទ្រគំនិតខ្លួនឯងទេ ត្រូវតែធ្វើអោយគេមើល ឃើញ លទ្ធផលសិន។

ខ្ញុំគឺអញ្ចឹង! នេះបានពិតជាខ្ញុំ ខ្លាឃ្មុំកម្ជិល។