ពាក្យពរជ័យសម្រាប់ជនប្រមឹក
ម្តាយខ្ញុំតែងតែហាមមិនឱ្យខ្ញុំផឹកស្រាច្រើនពេកទេ។ ក្រៅពីការជួបជុំគ្នាដើម្បីមុខរបរ និងការងារក្នុងវង់ផឹកស៊ី ខ្ញុំជាមនុស្សប្រមឹកម្នាក់យ៉ាងជោគជាំ ជោគរហូតដល់ថ្នាក់ម្តាយខ្ញុំលែងហាមហើយ គឺមានតែសួរថែមថា៖ កូន ចង់ផឹកស្រាស ឬ ទឹកត្នោតជូរ? រួចគាត់ក៏ពឹងគេដែលអាចទិញស្រាស ឬទឹកត្នោតជូរឱ្យខ្ញុំបានទៅរកវាមកឱ្យ កូនប្រមឹកម្នាក់នេះ។ នេះជាការលះបង់ដ៏ខ្ពង់ខ្ពស់ក្នុងនាមម្តាយម្នាក់ដែលសុំសីលប្រាំបី ដើម្បីកូនជាទីសម្អប់
កាលវិភាគការងាររបស់ខ្ញុំគឺ ពីថ្ងៃច័ន្ទ ដល់ថ្ងៃសុក្រ (គ្មានសុរា ឬជាតិអាល់កុលណានាំចូលក្នុងពោះវៀន ឡើយ វៀរលែងតែថ្ងៃបុណ្យ ដែលត្រូវបានសម្រាកពីការងារ) កាលវិភាគសម្រាប់គ្រួសារខ្ញុំ គឺម៉ោងប្រាំបួន ព្រឹក ដល់ ម៉ោងប្រាំល្ងាច សម្រាប់ពីរថ្ងៃនៃសៅរ៍ និងអាទិត្យ ដែលមានបញ្ចូលទាំងការទំនាក់ទំនងផ្សេងៗ ក្នុងមុខរបរ។
ជារៀងរាល់ថ្ងៃសៅរ៍ ចាប់ពីម៉ោងប្រាំមួយល្ងាច ដល់យប់ជ្រៅខ្ញុំតែងរីករាយនឹងផឹកស្រាតែម្នាក់ឯងនៅមុខផ្ទះ អានរឿងកំប្លែងភាសាអង់គ្លេស ជាមួយដបស្រា និងកញ្ចប់បារី។
ដោយសារតែបារម្ភពីសុខភាពរបស់ខ្ញុំ ម្តាយខ្ញុំបាននាំខ្ញុំទៅលេងមិត្តរបស់គាត់ជាវេជ្ជបណ្ឌិតរួចបង្ខំខ្ញុំឱ្យចូល ខ្លួនឱ្យមិត្តគាត់ពិនិត្យ។
រឿងដែលមិត្តគាត់ណែនាំខ្ញុំគឺថា៖
លោកវេជ្ជបណ្ឌិត៖ ក្មួយត្រូវតែដឹងថា សុរា និងបារីអាចធ្វើឱ្យក្មួយមានសុខភាពទ្រុឌទ្រោមម្តងបន្តិចៗ ប្រៀប ដូចពាក្យដែលគេនិយាយថា ស្លាប់បន្តិចម្តងៗ
ខ្ញុំ៖ តើខ្ញុំនៅសល់ពេលប៉ុន្មានទៀតអ៊ំ? (ខ្ញុំរាងស្លុតចិត្តដែលគ្រាន់តែឮពាក្យថាស្លាប់នេះ)
លោកវេជ្ជបណ្ឌិត៖ ទេ! អ៊ំចង់និយាយថា យើងផឹកស្រា ជក់បារីរាល់ថ្ងៃ គឺនាំឱ្យគ្រឿងក្នុងរបស់យើងចាប់ផ្តើម ខូចខាតម្តងបន្តិចៗ… ស្លាប់យ៉ាងយឺតៗ… មិនមែនឆាប់ៗនេះទេ! (គាត់និយាយបញ្ជាក់កុំឱ្យខ្ញុំស្លុតចិត្តពេក)
ខ្ញុំ៖ អូហ៍… ល្អណាស់អ៊ំព្រោះខ្ញុំមិនទាន់ចង់ស្លាប់ឆាប់ពេកទេ ខ្ញុំផឹកមិនទាន់អស់ចិត្តផង។
…
ព្រឹកថ្ងៃអាទិត្យនេះ ខ្ញុំក៏ប្រព្រឹត្តតាមទម្លាប់ខ្ញុំដដែល ខ្ញុំក្រោកពីម៉ោងបួន រត់ហាត់ប្រាណប្រមាណដប់ប្រាំនាទី រួចក៏អង្គុយជក់បារីនៅក្បែរកំប៉ុងស្រាបៀរដែលសល់ពីយប់មិញនៅក្បែររបងផ្ទះ នឹងអានកាសែតពីម្សិលមិញ ម៉ោងជិតប្រាំពីរព្រឹកហើយ ខ្ញុំក្រោកពីកៅអីប្រុងចូលក្នុងផ្ទះ ព្រោះមានសម្លេងក្មេងរើសអេតចាយបានមក រំខានចិត្តដែលប្រឹងផ្តោតលើព័ត៌មានលើក្រដាសកាសែត។ ពេលឆ្មៀងភ្នែកមើលទៅពួកវា ខ្ញុំឃើញក្មេងស្រី អាយុប្រហែល ដប់ឆ្នាំកំពុងសប្បាយជាមួយគ្រឿងតែងខ្លួនដែលគេបានបោះចោលនៅមុខផ្ទះមួយទល់នឹងផ្ទះ ខ្ញុំ។ ដោយសារពួកវាកំពុងដណ្តើ់មគ្នាចំពោះរបស់ដែលពួកវាត្រូវការ ខ្ញុំនឹកអាណិតក្មេងទាំងពីរនេះភ្លាម ៖ ហេតុតែគ្នាចង់ល្អ ចង់ស្អាត ខ្ញុំខំរកនឹកថាតើនៅក្នុងផ្ទះខ្ញុំមានរបស់របរបែបហ្នឹងដែរទេ? តែ…នឹកមិនឃើញ។
ខ្ញុំអង្គុយសម្លឹងពួកវាយូរគ្រាន់បើដែរ… ស្តាប់សម្លេងពួកវា ខ្ញុំគិតថាពួកវាជាអ្នកស្រុកចំនៀរខាងបន្ទាយមាន ជ័យ សៀមរាបអីហ្នឹង។ ខ្ញុំមើលឃើញពួកវារើយកសៀវភៅដែលមានគម្របរូបតុក្តតាស្អាតលើកមើលផ្អៀង ផ្អង។
ក៏ស្រាប់តែនឹកឃើញរឿងមួយ ខ្ញុំបក់ដៃហៅពួកវាមកជិត។ ដំបូងវាមិនចង់មកទេព្រោះមិនដឹងជាខ្ញុំហៅវាមែន ឬមិនមែនផង។
ខ្ញុំចូលទៅក្នុងផ្ទះរកមើលដបទឹកក្រូចដែលសល់ពីចូលឆ្នាំយកចេញមកក្រៅរួចហុចឱ្យក្មេងស្រីម្នាក់ដែលដើរ មកដល់មុន។
ខ្ញុំ៖ អាណេះសម្រាប់ញ៉ាំ។ ហើយណ៎! (ខ្ញុំចង្អុលទៅសម្បកកំប៉ុងស្រាដែលរាយប៉ាយក្បែររបង)
ខ្ញុំងាកទៅឃើញប្រដាប់កើបសម្រាមនៅក្បែរនោះក៏ទាញមកកើបដាក់រទេះរបស់ពួកវា។
ក្មេងដែលអូសរទេះមកដល់ក្រោយ ឃើញខ្ញុំធ្វើបែបនេះវាក៏សួរ៖ ពូអត់រាប់វាទេ?
ខ្ញុំ៖ ណូ! ទេ! មិនរាប់ទេ គឺឱ្យក្មួយ! (ខ្ញុំនិយាយទាំងមិនទាន់អស់ជាតិស្រាបារីនៅឡើយពីក្នុងខ្លួន និយាយម្តង ភាសាខ្មែរ ម្តងអង់គ្លេស)
ក្មេងទាំងពីរដើរមកទន្ទឹមគ្នាឈរពីមុខខ្ញុំ៖
អរគុណពូ! (គេលើកដៃសំពះយ៉ាងសមសួន) សូមឱ្យពូមានសុខភាពល្អ មាំមួន និងមានអាយុវែង!
ខ្ញុំដែលកំពុងស្រវឹងមិនទាន់ស្វាងស្រួលបួលនៅឡើយ ភ្ញាក់បន្តិចដែរចំពោះកាយវិការដែលខ្ញុំមិនបានរំពឹង ទុកនេះ។ ខ្ញុំប្រញាប់លើកដៃសំពះតបទៅវិញ៖
អរគុណ! សូមឱ្យក្មួយៗក៏មានអាយុវែង និងឆាប់…ខំរៀនឱ្យពូកែផង។
ពួកវាក៏បែរខ្លួនដើរចេញទៅជាមួយរទេះរបស់ពួកគេ ដោយទុកខ្ញុំឱ្យឈរគិតមួយស្របក់មុនពេលបិទទ្វាររបង ចូលទៅមុជទឹកសម្អាតខ្លួន។
នរណាថាក្មេងរើសសម្រាមជាក្មេងគ្មានបានរៀនសូត្រ គ្មានការចេះដឹង?
មេរៀនពេលព្រឹកមួយនេះខ្ញុំអាចនិយាយបានថាទ្រឹស្តីរបស់ខ្ញុំពិតជាមិនខុសឡើយ។
«មនុស្សម្នាក់ៗមិនអាចសម្លឹងមើលឃើញដោយភ្នែក ហើយវាយតម្លៃតាមតែរូបភាពនោះទេ» មនុស្សពិត ណាស់ត្រូវការពិនិត្យអង្កេតមើលឱ្យបានជ្រៅ ឱ្យបានយូរ ចឹងបានជាគេតែងនិយាយថា មុននឹងជ្រើសរើស គូជីវិត យើងត្រូវពិនិត្យស្វែងយល់ឱ្យបានយូរ។
អរគុណក្មួយស្រី! ពាក្យជូនពររបស់ក្មួយគឺផ្ទុយទាំងស្រុងពីការណែនាំរបស់លោកវេជ្ជបណ្ឌិត។
ឯវំ
ថែរក្សាសុខភាពផងលោកពូអើយ ដើម្បីខ្លួនឯង និង អ្នកនៅក្បែរខ្លួនយើងជាពិសេសអាណិតអ្នកម្តាយដែលកាន់សីលហើយឆ្លៀតទៅកុម្ម៉ង់ស្រាស ទឹកត្នោតជូរឲ្យកូនទៀត ពិតជារកមិនបានទេ ។
គាំទ្រយោបល់បងសុធា!
អរគុណយោបល់របស់ បងប្អូនទាំងពីរ ខ្ញុំនឹងជម្រាបគាត់ជូន។
សំណាងហើយខ្ញុំពួក Straight Edge
រកកន្លែងបកប្រែមិនចេញទេ តាម៉ាប់អើយ! Straight Edge ហ្នឹងស្អីគេ?
Straight Edge ជាជនដែលរស់នៅក្នុងសង្គម ហើយមិនជក់ មិនផឹក មិនប្រើថ្នាំ ។
វាមានន័យជ្រៅជាងនេះទៅទៀត តែសម្រាប់ខ្ញុំគឺបណ្ណឹង ។ នេះបង http://en.wikipedia.org/wiki/Straight_edge
អរគុណម្ចាស់អូន!
បងកល្យាណសុំដូរកន្លែងបញ្ចេញមតិឲ្យនៅត្រឹម ២ ប្រអប់វិញទៅ បើអញ្ចឹងទេវាធ្លាក់មកចំហៀងខាងស្ដាំនេះយ៉ាងអន្លាយដូចភ្នំដងរែកហើយ ។
សុំសួរមួយ… ពាក្យ “ខ្ញុំ” នៅទីនេះ ជាអ្នកណាគេហូវ? ព្រោះតាមការរៀបរាប់សាច់រឿង ដំណើរដើមទង កាលអើយកាលនោះណា… គឺថាសកម្មភាពតួ “ខ្ញុំ” នៅទីនេះ គឺជាមនុស្សប្រុសចំតួហើយ…តែចំឡែកឯម្ចាស់ផ្ទះ គឺសុទ្ធតែជា “ឆីៗ” ទៅវិញ…។ ដូច្នេះ តើលក្ខណៈសម្បត្តិរបស់បុរសក្នុងប្រកាសនេះ ជា “ឆង់ឆា” ឬក៍ជាមិត្ត “យិនស៊ិនពាន់ឆ្នាំ” របស់ម្ចាស់ផ្ទះ?… សួរលេង… មិនមែនសាលាក្រុងអោយសួរទេ… ឆ្លើយក៍បាន មិនឆ្លើយក៍បាន… 😀
ជម្រាបពូស្រុកស្រែ! ខ្ញុំទើបតែដឹងខ្លួនឯងកាលពីពីរអាទិត្យមុនថា ខ្ញុំអត់ចេះសរសេររឿងដែលប្រើ «បុរសទីបី» ឡើយ។
សូមលោកពូមើលចុះ គ្រប់អត្ថបទរបស់ខ្ញុំគឺសុទ្ធតែ ប្រើ «បុរសទីមួយ» ទាំងអស់។
អ្វីដែលអាចសម្គាល់បានគឺ បើសិនរឿងនោះជារឿងខ្លី ខ្ញុំគ្រាន់តែចាត់ថ្នាក់វានៅក្នុងរឿងខ្លីប៉ុណ្ណោះ។
សូមអរគុណចំពោះការចាប់អារម្មណ៍របស់លោកពូ។
ខិខិខិៗៗៗ… ដឹងតើ… តែខ្ញុំភ្លេចសុំទោស… ព្រោះខ្ញុំនិយាយ ផា អោយម្ចាសើផ្ទះលេងទេ… តិចលោខឹងដុតផ្ទះស្រុកស្រែខ្ញុំចោលចុះ?… ចាំមើលពេលទំនេរបន្តិច ខ្ញុំនឹងសាកល្បងសរសេររឿងខ្លី ដោយខ្ញុំដើរតួជាមនុស្សស្រីវិញម្តងមើលមើល៎… 😀
ខ្ញុំមិនហ៊ានដុតផ្ទះពូទេ ខ្លាចពូដុតផ្ទះខ្ញុំវិញ:D តែយ៉ាងណាផ្ទះពូបានចុះបញ្ជីដីធ្លីរួចហើយ មានប្លង់រឹងហើយ ។ ចាំមើលពូរឿងខ្លីពូ តួជាស្រីវិញខ្ញុំនឹងផាដូចដែលពូបានផាឱ្យខ្ញុំ ដើម្បី …សងសឹក… 😀
អត់បញ្ហា… ផាយ៉ាងម៉េចក៍មិនចេះស្ពឹកដែរ ព្រោះ ខ្ញុំប្រឡងជាប់វិជ្ជាគុណខាង “ផាអោយគេ និងគេផាអោយវិញឡើងស្ពឹកៗ” រួចហើយ… 😀
ហាហាហា ពូស្រុកស្រែឆ្ងល់ដូចខ្ញុំធ្លាប់ឆ្ងល់លើកមុនដែរ 😀